細價股粉塵爆 Checklist求自保
2018年3月9日

大股東在急跌當日要錢唔要貨,管理層在停牌之後跳船,高管失聯,公司沿用嘅核數師有金漆招牌,兼且沒有保留意見,照咁睇呢幾個表徵有時可能電光火石間出現,殺小股東措手不及,情況就好似補時被對手入波一樣,完全無仇報。

撰文:黃玲、李澄

證監出手,老廉拉人,醫生與大王對峙登上八卦雜誌封面,細價股塵爆第二波演烈了,又沉寂了,多得獨立股評人David Webb大半年前的「謎網50」,掀起股壇仙魔大戰。李澄見市場有何風吹草動,多數會求教師父,邊按腳減壓,邊聽財技tutorial。

黃玲:「阿澄,約星期六下午都遲到?」

李澄:「(正在唞大氣)同班Friend食晏傾耐咗,佢哋對細價股情有獨鐘,不過謎網股塵爆之後,又驚有第二波,怕自己踩中地雷,想我指點迷津。」

黃玲:「世上邊有免費午餐,自己懶睇年報,少睇公告,就想得世間財?難矣!不如你做張健康申報表﹝表一﹞,教佢哋追蹤爆煲股。有無睇過楊邦個債券trading框架呀?簡單易明值得參考。」

李澄:「當然有,唔trade bond都有印象,Checklist形式最易操作。其實一間公司爆煲點會無聲無息,傷風感冒都會頭痛咳兩聲,我仲記得師父本書講過爆煲股先兆,可以借來用嗎?」

黃玲:「Why not?有讀過拙作都知道唔少上市公司鍾意塗脂抹粉,最緊要教大家睇tricky位。就好似早前被沽空機構狙擊的前彤叔愛股輝山乳業(06863),試過停牌後又復牌,以為大步檻過,最後都係『高台跳水』一日跌近九成,至今仍然復牌無期,唔少人睇漏眼。」

 

管理層大難臨頭各自飛

李澄:「輝山股價大跌之後公司停牌至今,管理層大難臨頭各自飛,4名獨立非執董先以要投入更多時間處理其他事務、繁忙等例牌原因跳船,之後再有執董及CFO 在短期內『You jump, I jump』,睇落形勢相當嚴峻。」

黃玲:「不過呢,部分上市公司的家族味很濃,見有『自己人』請辭,可能要拍爛手掌,如果一出一入是換個獨立專業人 士,反而有助提升管治質素,避免自己友『圍威畏』。」

大股東關鍵時刻減持

李澄:「計我話大股東同管理層同樣重要,佢哋嘅股權變動都要昅實,而且要睇Timing,公司謠言滿天飛時,小股東梗係想管理層挺身而出,如果呢個時候『走佬』一定有啲野。根據港交所紀錄顯示,輝山股價去年初大跌當日,大股東大手減持2.5億股,每股平均價較停牌前股價還要低,又一個危險訊號。」

黃玲:『又唔可以一概而論嘅,我驚你班朋友杯弓蛇影。部分上市公司想引入機構投資者,但市場上貨量不足,又等不及公司批股,便會與公司大股東商量以「先舊後新」方式,由大股東先以某價錢轉該 股份予機構投資者,之後再由上市公司發新股予大股東。』

李澄:「咁董事高層失聯又如何?輝山專責公司財務的一位執董失聯,最後要驚動警方介入。董事失聯多數涉及本身或公司財務問題,近年發生多宗上市公司高層失聯事件,當然好多公司『最後無事』,但股價多數會經歷過山車。」﹝表二﹞

黃玲:「董事、大股東要金睛火眼昅實,核數師角色一樣咁重要,嚴格來講核數師並非公司『自己人』,但又可能是最快知道公司出事的人。上市公司如果換核數師唔係小事,尤其是換人密過換衫嗰啲公司。」

——節錄自三月份《信報財經月刊》